close
花聲若響
樹葉落落，有飄落塗 sua sua的聲音；
涼風吹過，有撞著空氣siu siu的聲音；
雨水滴落，有硞著厝頂tap tap的聲音；
毋過，你敢聽過花的聲音？
春天的時，一片一片的花瓣，
慢慢仔開，慢慢仔媠，
探出美麗的面容，
譜出溫暖的笑聲，
毋過，你無法度用耳仔聽著！
秋天的時，一蕊一蕊的花蕊，
慢慢仔謝，慢慢仔焦，
現出清瘦的身軀，
躄佇曠闊的土地，
毋過，你無法度用耳仔聽著！
花聲若響，
是你拍開心靈的目，展開心靈的耳！
花聲若響，
毋是你聽見大自然的聲，全然是
聽見你家己心肝底的聲；
聽見朋友講袂出喙的聲；
放棄家己大聲講話的聲。
花開花謝，無聲無說，
你敢捌聽見――花的聲？
全站熱搜
留言列表
