（一）夜港墘，春天爆穎的筆芯發光―寫予詩友 文傑
一枝筆無鉛，等人湊跤手
一个人，敢會無聲無影
一支手兩指勻勻仔拍字
拍開天地，雷公出聲爍爁發光
拍通麻痺的血路，腦性多情的心肝振動
一字兩句三段四篇，靈思的靈魂
軟身的白娘仔恬恬仔轉骨
牽絲吐詩，褪殼轉生
一雙跤四輦寬寬仔踅街
踅轉武鹿，阿媽寶惜庫魯疼痛
踅頭充電的自動車，發電送愛的筆芯振動
親情師恩鄉土國家，文生的文筆
軟身的戲尪仔恬恬仔活骨
動心換面，上台搬戲
伊畫滿腹爆穎的情愁日日春
一盒思慕的筆搵滿青春的墨水潑墨
寫實情詩的戀談說愛咧孵夢
伊激一甕醇味的薄酒夜來香
一粒動情的心挨二弦仔吟唱思想枝
釘根島嶼的鄉情歌詩足感心
一台撐篙的舢板，孤身堅心
過溫情大湧的人海，入厚風起湧的情海
梧棲的九降風年年來，風聲講人生海海
清水蔡家吹送多情的文風，海海人生四海出帆
五汊港邊，你放春天爆穎的風吹颺颺飛
牛罵頭詩人悠悠仔迎風踅街
一座燈塔，一萬燭的光
一个人，有聽見聲有看見影
（2010/08/10定稿）
（二）Ngiáu耳屎的下晡時仔
12公分懸（kuân）的戶碇
西照日的跤步偷偷仔迒（hāⁿ）過
歇佇淺青色的壁跤，恬恬仔
進行下晡時的光合作用
我無看見影，有聽見聲
一隻田嬰，輕輕仔咧拽翅
細細支耳耙仔鋤頭掘一下掘一下
扒出耳仔涵空內黃酸仔黃酸的田塗
Ngiau-ngiau的耳，鬆鬆的田塗裡
掘開一片仔一片蟯蟯動的記持
孽潲毋聽話的狡怪囡仔
予人罵欠教示的錄音帶一塊仔一塊
恬恬趴咧的耳殼仔，一耳
密密黏佇咧阿母的跤頭窩頂
耳空窟仔深深，一耳開開的喇叭
電台放送民謠縈纏歸下晡
阮兜無痰無嗽免買廣告藥仔啦
心肝窟仔傳來幸福的心跳
西照日的跤步迒過囉
12公分懸的戶碇內
兩扇柴門關咧，月眉無光真緊著落眠
我聽見床母偷偷行來的跤步聲
「乖囝个緊睏！一暝大一寸！」
明仔載早起，挽菝仔才挽會著
（2010/04/30）
（三）做平安
（咚鏘 咚鏘 咚哆嚨咚鏘）
「紅醃腸八卦棍」大戰「甘草菝雷公槌」
（咚咚鏘 咚咚鏘 咚鏘咚鏘咚咚鏘）
「燒酒螺流星鏢」車拚「麥芽餅藤盾牌」
箸做箭 柴做刀 樹枝做劍 塗丸做暗器
規庄的囡仔兄弟姐妹屘姑仔全全扮仙做神變鬼變怪
順天宮廟埕犒軍犒將鑼鼓響叮咚
魚池仔南爿的蘆筍園內哀爸叫母
（衝啊！衝啊！哇哈哈哈哈……）
「妖魔喝一聲苦—―惱啊！」
「兄弟免驚！咱攏佇遮！」
「猴囡仔宋江陣」鎮妖除魔保鄉里
（ 庄頭有名聲 庄尾真出名 ）
「阿金、阿木仔毋緊來點香拜拜求神明保庇予恁考試考一等……」
「阿水、阿火仔若無過來湊拆金紙到時恁爸著電予恁尻穿金金金！！！」
「阿土仔啊那會攏無看見影是啥人欲來湊擔牲禮米籃轉來去食暗頓咧？？？」
（2010/02/02）
（四）古物商的麥芽餅
（歹鐵仔 鴨毛 簿仔紙 通賣否）
一台富士霸王的大台鐵馬，跤輕輕仔踏
載來規禮拜攏無愛睏晝的央夢
歹鐵仔燒燙燙，簿仔紙重汗
日頭過半晡，囡仔人尻穿火當炎
一頂草笠仔掩崁袂著，曝烏烏
卿仔叔公的雙跤雙手，曝烏
卿仔叔公咖啡色的秤仔，曝烏
鐵馬後座輦仔邊的柴箱仔，曝袂溶
等啊等真久彼味牽絲的膏膏纏
「恁骨力流的汗真重，足足有十斤八兩！」
秤出算袂清楚的歡歡喜喜
三雙烏烏烏的手，捏啊捏出
目睭金金流喙瀾的眠夢
愛食甜的賊，兩片脆脆的餅包圍
攏總掠起來，送入去喙裡關門審問
押入枵枵枵的腹肚大牢裡乖乖仔坐監
一台富士霸王的大台鐵馬，跤步沉重離鄉
載走規禮拜無愛洗喙的戅夢
（2010/01/21）
（五）共匪傳單落佇甘蔗園
莊敬自強的田庄，聽無遠遠冷戰的砲聲
鑽過烏水溝國防雷達的簡體蒲公英
落佇甜蜜採收後無啥利葉做掩體的淺淺塗壟裡
毋捌字的土地恬恬接收，蛀齒的猴囡仔手賤輕輕仔扱起
校長導師雄雄攏去煞著，千交代萬交代口號聲聲句句
一片一片薄薄的心戰利刀，剖開
國防部的心跳驚惶，教育部的胃搐搐疼
繁體字加出來的筆畫，足足有夠
寫滿萬惡的罪狀，教過三冬唸過五冬
（2010/01/14）
楊焜顯簡歷
祖厝是彰化溪湖，佇彰化芳苑草湖大漢，臺南師範畢業分發了後，著攏一直佇台中縣梧棲國小做老師，目前蹛佇清水牛罵頭。是「做田人」的囝孫仔，佇人文土地的面頂贌書田、鄉田、心田、夢田四塊田地，轉作兒童文學、地方文史、台文書寫以及文學研究，當作青壯年以後跤弄手弄、動頭動腦的人生四大志業，佇漸老的路裡心猶原日日春。
捌採錄出版《梧棲鎮閩南語故事集》，合編寫過鄉土教材《九降風吹的故鄉：五汊‧梧棲‧新高港》、彰化縣村史《牛稠仔的故事》、個人的台語詩集《磺溪水流過半線天》。
台文作品捌得過海翁台語文學獎囡仔詩正獎、現代詩副獎；李江却台文詩獎（阿却賞）黑面琵鷺二賞；教育部台灣閩客語文學獎教師組台語散文第一名；台中縣本土語言文學創作閩南語新詩第二名。目前佇彰化師範大學台灣文學研究所碩士班在職進修，論文研究主題：「褪殼的母語‧文學的轉生：戰後台語新詩語言美學研究」。
詩 語
寫詩、讀詩就若照一擺X光仝款：是我咧操作機器；嘛是我咧予機器操作，佇機器佮咱中間，有一種無影卻是有形的光線，穿透咱肉體的肉、骨，見證一種有影卻是無形靈魂的骨肉。所以我是會發光的X光機；我是會傳光的X光線；我亦是予X光照射後，提著一張烏白底片的某一个會看見光的人。看見暗烏身軀內，微微仔透射的自性幽光。
寫詩、讀詩予咱會發光；寫詩、讀詩予咱會傳光；寫詩、讀詩予咱會看見光。有光，蜘蛛會牽絲；娘仔會吐絲；人會牽詩、吐詩。看見光的人，會反倒轉來傳光，會反倒轉來發光。有光，烏暗中願意等待；等待中靜心孵夢；孵夢後轉變心懷；心懷一拍開，予新的光走入來，經歷褪殼的苦疼；予新的光湠出去，分享轉生的慈悲！你咱著做伙光。
作品合評時間：2010年9月11日（週六下午3:30~5:00）
地點：台中縣梧棲鎮梧棲國小（台中縣梧棲鎮民生街45號）
出席（依發言次序）：蔡秀菊、蔡榮勇、林鷺、黃瀛寰、蔡文傑、楊焜顯、姚金足、呂招蝶、劉葉慈、張怡寧、康原、黃木壽、戴壁吟、蘇美燕、王美雲、陳旻昱
留言列表
