第二章 消 息
人命日時不敢保暗時，有人早起時出門，就安爾不知何位去，有人晚
頭仔倒轉來，半暝被魔神仔掠去，就安爾無消無息。風聲傳來傳去，人人
驚惶，不知如何是好。受難家屬無地救人，要見人，人無地見；要見屍，
屍無地存。天公伯仔不時在流目水……。
未赴給他披一領外衫
我歸身軀悽冷
我的血冷 冷 冷霜去
干單手底剩
伊出門時匆匆忙忙拎一下
一絲絲仔溫暖
半暝清醒
每遍鐘摃一聲
恰如著驚的槍聲
我不相信
鐘摃兩聲 三聲
我不相信 我不相信
天光
我放落啼啼哭哭的查某子
披頭散面恰如鬼
在四界找
由無方向
找到所有的方向
探聽誠濟驚惶的嘴
探聽誠濟著急的耳孔
探聽誠濟黑天暗地的機關
由街頭巷尾
行到荒廢的郊外
行到水尾湳仔地
行到山嶺絕壁
無消息
是唯一的消息
生死路上全然無消息
我的青春也就安爾無消息
我唯一的等待
就是消息
第三章 呼喚
事件造成若濟家庭破滅，超過戰爭的衝擊，害著無辜的下一代，失去
家庭扶持倚靠，紅字貼在身軀頂，給人當作叛徒的子兒，行到何位就遇著
歹看的目色，給人指指拄拄。風聲雨聲統在身軀邊攪吵……。
看到阿母的白頭毛
看到阿母面的皺紋
阿母的青春
永遠無消息
看到阿爸的像
猶原真緣投
看到阿爸在我眠夢中
猶原真四壯
阿爸的青春原在
半眠
鐘摃一聲
我也會驚清醒
聽到阿母匿在哭
在學校兮
有的同學加我創治
講我是歹人的查某子
我干單有忍受
不敢給阿母知也
吃頭路時
有的同事對我鄙相的眼光
還復在偷講後壁話
我干單有忍受
不敢給阿母知也
為什麼我聽著鐘聲會驚？
由鐘樓傳出來
清悠的聲音
敢不是阿爸在呼喚
呼喚我呢
還是呼喚台灣
每年經過寒冬
有若濟寒夜
鐘摃一聲
在惡夢中驚醒起來
也驚醒櫻花
然後驚醒春天
阿母青春的消息
轉來我的身軀
阿爸青春的歲月
還復在無定著的歷史中
找未著位置
第四章 輪 迴
1947 年出生的紅嬰仔，被人稱呼做冤魂轉世。受難者不願安息，轉來
要求公理和正義。對愛惜的鄉土，不甘放捒，對不明不白的政治、不明不
白的社會、不明不白的遭遇，除了掛念信望愛，還復會當找什麼明白的道
理。狂風暴雨什麼時瞬才會過去……。
我在半暝出世
鐘摃一聲
無悲喜交集的哭聲
額頭黑青 憂頭結面
相命仙仔講是驚著
無不著 驚著的是
阿母 不是我
阿爸不知有驚著無
我從來不曾看過
阿爸的樣
有人講我是阿爸神魂轉世
我常常在鏡內
恰如看到阿爸的影
學校讀書時
先生剾洗我是叛徒的子
同學加我撣石頭
無人加伊阻擋
軍營做兵時
我常常被人分配苦工
半暝企衛兵看見幽靈出現
無人欲相信
吃頭路時
我被人禁止擔任公務
我未使得出國
我未使得競選公職
結婚時
連丈人丈姆統不敢出席婚禮
我探聽阿爸的行蹤
阿母一句話都無愛講
阿姐干單會偷偷拭目水
我暗中追查真相
干單知也答答滴滴
我絕對不會怨恨
社會上的苦難
不止有生命無常
有人散赤到鬼欲掠去
有人受到生苦病痛
留言列表
