tai299554926的部落格

這五首詩干焦〈街景〉是華語詩，其他攏是台語詩。準講這唯一的一首華語詩，嘛是真有台語味，
參伊崇拜的吳晟的詩真類似，雖然語言使用華語，猶是台語味十足。「吾鄉的老人」敢毋是遐的吳晟
《吾鄉印象》內底ê老人？ 經過一个世代矣，遐ê老人猶原「馱著一世人╱ 慢慢地跛向╱幽暗的角落
」，內心的心酸化做「潑辣九降風╱擰著藍色競選旗幟的耳朵╱漫罵而過」。唉，按呢，敢袂傷過頭
「老人」化？台灣漸漸邁向「老人化」，這款的街景，敢會是過頭無力的預言？
 〈佇228紀念公園〉所表現的嘛是「老人」心境。佇228紀念公園的彼欉「老欉樹」為何「斟酌看風，
一步一步╱來追殺落葉」會「內心恬靜╱親像當年」？這是無奈、冷淡抑是殘忍的幫兇？ 佇這二首詩
，文傑攏寫了真短，嘛真無清楚。雖然用真濟象徵、暗示，不過親像按呢的詩，會使發展予較深較闊
咧。
  寫予Z的情詩，以及寫予敬愛的詩人吳晟的詩就無按呢的躊躇，就攏共感情表達kah真清楚嘛真kap-
tsiah。吳晟嘛是我敬愛的詩人，文傑這首詩寫出我的心聲，我想當時伊會投稿予我主編的《鹽分地帶
文學》台語詩專刊，毋是無意中投的，的確是真了解阮同時對吳晟的敬疼。〈妳是我心內的一首詩〉
有重複著〈佇二二八紀念公園〉的意象「風」佮「落葉」：〈筆〉佮〈佇濁水溪邊〉嘛有重複的意象
「角度」、「姿勢」。予我感覺〈筆〉嘛是吳晟，吳晟嘛是〈筆〉。文傑寫〈筆〉的時敢嘛是用吳晟
做模仔？
  蔡文傑的詩我攏真佮意，讀伊的詩無傷大的負擔，清清甜甜，真有價值紹介予人讀。