周華斌
吳順發，筆名吳夏暉，1947年佇台南縣白河鎮仙草里出世。1962年開始寫小說；1965年加入「笠」詩社，開始寫現代詩；1991年佮林宗源、黃勁連、林央敏、莊柏林、李勤岸、胡民祥等組成「蕃薯」詩社，這是台灣有史以來第一個台語詩社。自以早開始道用筆名吳夏暉發表華語詩，唔佫發表台語詩的時是用本名吳順發。
1994年，岩上佇〈吳夏暉〈中文系統〉一詩賞析〉講：「吳夏暉誠早道寫詩，而且佇笠詩刊創刊第二年道加入同仁，詩齡約三十年。詩作品也未少，可惜猶未結集出版，所以無法度引起詩壇較濟的注意。」[2]唔佫即款情形，佇隔冬道有淡薄仔改變。1995年，吳夏暉以收錄有華語詩佮台語詩的《域外的建築》詩集，榮獲第三屆南瀛文學新人獎，台南縣文化中心（即陣的文化局）嘛替伊出版即本詩集[3]。
親像岩上講的，吳夏暉誠早道寫詩，但是因為政治緣故，伊曾經佇1980年封筆，停止創作。解除戒嚴的1987年隔冬，1988年起，吳夏暉以「電腦詩」系列復出詩壇，親像〈電腦病毒〉、〈中文系統〉、〈電腦語言（一）〉佮〈電腦語言（二）〉等等。雖然「電腦詩」系列有對現實強烈的批判，唔佫伊借用電腦的基本概念，以隱隱現現的手法寫出台灣社會現象，甚至為著欲柔化內容，嘛會參入一寡戀情的用語，這佇當時是一種突破性的寫法。李敏勇曾經評論[4]過吳夏暉的電腦詩〈鍵盤〉佮〈列表機〉，伊講：「位『鍵盤』到『列表機』，詩人巧妙引用電腦機組的特性，刻劃國民黨統治權力的種種敗害相，互人深刻的感受」，嘛帶互讀者有相當「趣味性的效果」。
1990年起，吳夏暉佫創作出「詩說」系列，簡捷有力的寫出社會亂象，親像寫萬年國會的〈法統〉、諷刺貪圖利益的〈焚寄「民主女神號」〉、寫反共義士掠人綁票的〈浮水印〉等等。這是一種「新聞性的短詩，偏向記事所代表的意義」，話語誠利，但是未失去詩質。雖然攏是寫台灣的現實，唔佫「詩說」系列佮當時繼續咧寫的「電腦詩」系列，是完全無共款的風格。
「電腦詩」佮「詩說」系列的華語詩，攏是創新的寫法，而且有誠特殊的吳氏風格，曾經陸續發表佇《自立》報系、《民眾日報》佮《笠》詩刊，內底有「詩人的社會良知」佮「以詩文學改善人類慢慢腐化的心靈」的企圖，得著誠好的風評。唔佫，吳順發的台語詩咧？
雖然吳順發自以早道對台語文學有興趣，唔佫伊夠加入「蕃薯」詩社，才開始寫台語詩。1991年5月初十完成的〈有一條歌安呢唱〉，是吳順發的第一首台語詩，共年8月發表佇《笠》詩刊第164期。以後，陸續創作〈烏名單〉、〈血跡〉佮〈寫予牽手〉等等的台語詩。空嘴哺舌，歸氣咱直接來欣賞一首伊佇1995年12月15日發表的〈昨暝，夢著故鄉〉：
假使咱唔捌熟似
阮嘛未去愛著妳
一日無看
暗頭就歹睏
妳的形影
是一條山路
佇暝尾行到天光
匿佇山內的故鄉
親像路邊檨仔欉
時機若到
伊就會吐熿
熱天樹影
圓圓結歸粒
是這呢淒美的愛
阿祖滯過的所在
逐日透早等雨水
雨若唔落
山田會涸岸
中秋過了
佫再閏雙八
山頂敢會等著雨
昨暝的故鄉
田底那會無澹土？
———1995年9月27日寫佇新營市[5]
即首詩第一節，詩人用情人的意象，寫出對故鄉的愛，「一日無看∕暗頭就歹睏」。尤其是彼條佇暝尾行到天光的「山路」，一定踏滿詩人的腳跡，鋪滿著詩人的記憶。
第二節，描寫佇「山內的故鄉」路邊，有種著「檨仔欉」。結合對「檨仔欉」的印象，表現故鄉的土地「時機若到」，就會親像檨仔「吐熿」，有收成。唔佫，檨仔「圓圓結歸粒」，那會是「淒美的愛」？捌聽吳順發講過伊初中的時佇檨仔欉腳等公車，發生過純純的初戀故事，敢會道是佇「熱天樹影」下腳，曾經有彼段無結果的感情？佮「圓圓結歸粒」的好光景對比，才會更加顯明「淒美的愛」？
第三節，講著故鄉的田園逐日攏咧等雨水，「雨若唔落∕山田會涸岸」。道咧歹年冬了，誰知「中秋過了∕佫再閏雙八」，所以詩人會擔心「山頂敢會等著雨」？故鄉的父母佮鄉親攏是看天食穿的作穡人，雨水若無來，是欲安怎生活？1995年，舊曆閏八月，詩人巧妙的利用寫作彼冬欠雨水佫拄著閏月的現實情形，表現對故鄉的關懷。
最後一節，「昨暝的故鄉∕田底那會無澹土？」誠互人心酸的詩句，充滿著詩人煩惱故鄉佫等無雨水致使山田強強欲涸岸的心情。
誰講寫故鄉，干單會停留佇望月、望黃昏的情景？吳順發即首詩道用無共款的方式，描寫伊對故鄉的懷念佮唔甘，以及對台灣土地的關心佮愛。誰講用台語寫未出好詩？吳順發即首詩的語言水佫溫柔，參伊寫華語詩的風格完全無共，而且水準完全無輸華語詩。
2005年4月20日定稿佇新營
留言列表
