出版台語詩《八卦山》以後，為著保存母語文化，阮寫過二百外首ê台語歌，出版《逗陣來唱囡仔歌‧附CD─動物、節慶、童玩、植物》四本，真濟演講攏用詩歌來傳唱台灣，受著真濟人ê肯定，阮更加認真創作台語詩，用詩寫史是阮ê文學觀點，這本《番薯園的日頭》中，第一輯〈番薯園的日頭〉以詩為台灣作家立傳，保留台灣作家ê生活故事；第二輯〈失蹤的月娘〉寫出台灣社會的各種現象，有淡薄仔批判ê意味；第三輯〈街頭巷尾的詩情〉以台灣小食入詩，用詩記錄台灣產業；第四輯是本詩集台羅拼音，予看未曉漢字ê人來讀。
有人講：「使用母語是一種基本人權」，閣講：「文化、語文kah身分ê認同，有幫助信心ê建立」，這款ê論點用愛爾蘭這個國家來講：「愛爾蘭ê語言運動kah獨立建國，是結合文化認知追溯身分ê認同來協同建立基業……愛爾蘭人放sak母語，改用英語，kan-nā知影英國文學，對家己ê文學傳統mā-bô 半項，喪失母語是英國化上大ê危害，英國征服愛爾蘭，hōo英語強加佇愛爾人ê身上，佇完全無保留ê英國化同時，已經失去予世界認定是一个獨立國家ê資格。經過七百冬外族ê統治，最後愛爾蘭佇1922年建國，愛爾蘭以母語、文化ê觀點建國傳作世界美談。仝款波羅ê海三國家：立陶宛、愛沙尼亞、拉脫維亞，過去遭受著德、俄ê遭踏Kah威脅，佇1921年獨立，前後對母語、民謠ê收集Kah注重，攏發揮著語言文化是創國ê力量。」這款ê論點，強調語言認同是人民意識ê覺醒，也是一種國家認同ê基本要件。
語言毋是kan-nā人Kah人中間溝通的工具，語言是一個族群的生命符號，欲滅掉一個族群，先將伊ê語言滅掉，台語學者廖瑞銘寫著「『中國人講，beh亡人之國，先亡人之史』，我想愛閣加一句『beh亡人之史，先亡人之語言』」。這實在是一句真重要Kah話，大家愛詳細去思考。咱定定聽著一句諺語：「有唐山公，無唐山媽」，共咱講以前為中國(唐山)來台灣ê大部分是查甫人，到台灣為了傳宗接代kah遮ê平埔族查某結婚，所以，台灣人ê血統，有一寡人有平埔族ê血統，但平埔族ê語言消失，平埔族這個族群佇台灣也消失。閣為歷史上日本人統治台灣實施ê「皇民化運動」來看，推行國語(日語)，siōng主要是希望台灣人hōo同化成做日本人，袂記家己ê祖先。客家人有一句話講：「寧賣祖先田，不忘祖先言」，可見母語比財產閣較重要。
照林茂生ê研究，日本人以「國語」(日語)做教育基礎ê問題：「以特別注意教導國語做為整個教育的基礎，有三個理由。第一，日語要成為此島的官方語言；第二，日語是傳授教育給台灣人的媒介；第三，日語是同化的工具，也就是日本化台灣人民。」針對第三個問題，咱愛去注意，一個國家語言ê重要性。語言ê同化也是一種生活同化ê方法。但是若強迫接受異族ê語言，可能產生族群意識ê對立，造成難以彌補ê傷痕，一百外年來執政者ê語言政策，已經對台語造成了真濟ê傷害，佇台灣毋管是原住民、客家人、閩南人，母語ê流失是逐家攏知影ê問題。
做為一个台灣人，為著欲救母語ê流失，上好ê方法是用家己的母語創作文學，予母語佇文學作品中傳落去，予流失ê語詞閣活起來，延續咱語言ê生命力。在1930年代，台灣ê先輩作家連溫卿、蔡培火、鄭坤五、賴和、黃石輝等前輩，就提倡用台灣話寫作，可見保存母語是每一個作家應該去承當ê義務，向望「逐家來寫台語詩」，揣回台灣人ê自尊心。
本詩集ê出版，感謝今年得著國家文學獎ê作家宋澤萊，kah台語詩人林沈默為這本冊踏話頭，南華大學文學系曾金承老師，寫一篇真長ê作品分析，李桂媚小姐ê插圖，謝金色老師ê拼音，hōo這本冊增加真大ê光彩。感謝以外，希望你會合意這本冊，嘛期待逐家來寫台語詩，為台灣文學來拍拚！
註解：
1.kah：合。
2. ê：的。
3.kan-nā：干若 (只有)。
4.hōo：予。
5.sak：捒。
6. mā-bô：嘛無。
7.beh：欲。
8. siōng：上
留言列表
