close
烏面琵鷺南方介故鄉（客語詩） 江 嵐
烏面琵鷺
飛過千里旅程
跈風飛轉南方介故鄉
高高介天
闊闊介嘉南平陽
包容天下生靈
細細介鯽魚
做得畜到像鯉嬤樣
珊瑚潭仙女照鏡
打扮梳妝
嘉南大圳無處不映月
千家吟唱
無分官田抑係鹽分地帶
富貴貧窮共食一坑水
米白禾黃
台江內海介耕牛同戰鼓
層層疊疊
安平追想曲一聲聲
港邊回響
雲起介山峎牽牛食草
日落介海唇打魚唱歌
細阿哥仔 細阿妹
拈揚尾打草蜢
捉入夕陽肚項打採茶
家家戶戶男女老嫩
煞猛打拚耕田種地
對日頭出
做到月光光
祖公Kiam過烏水溝
曬蓬萊介日頭
食福爾摩沙介水
四百年介風景
係西拉雅阿婆
好唱歌介髻鬃花
放一隻紙鳶仔飛上天
清風涼爽吹起知足介幸福
槓槓槓槓介腳骨
踏出靚靚介浪花
生命係
長長介河灞
闊闊介平陽
年年月月唱等快樂介山歌
立秋
烏面琵鷺在冷風中
轉到南方介故鄉
交春
帶等南瀛介祝福同北方講
台灣介人情係仰般介燒暖
（2008/07/02）
全站熱搜
留言列表
